Դօրիանին դաժանաբար ծեծել են (հոդված)

2010 թվականի մարտի 16-ին «Հրապարակ» օրաթերթի 502-րդ համարի շապիկին հրապարակվեց «Դօրիանին դաժանաբար ծեծել են» վերնագրով նյութը, որտեղ խոսվում էր Թատերական ինստիտուտում տեղի ունեցած ծեծկռտուքի մասին, որի արդյունքում ինստիտուտի ուսանողներից մեկն հայտնվել էր վերակենդանացման բաժանմունքում։ Հրապարակման մեջ նշվում էր, թե ծեծված տղան հենց ինքը՝ Դօրիանն է:

Նյութն արագ տարածվել էր մամուլում ու բլոգներում: Այն հրապարակել էին նաև ԱՊՀ պետությունների և Ռուսաստանի լրատվամիջոցները՝ հիշատակելով «Սատանան մայրամուտին» պատմվածքը և տեղի ունեցածը բնութագրելով իբրև պայքար հոմոսեքսուալիզմի դեմ: Մինչ սոցիալական ցանցերն ու ֆորումներն հեղեղվում էին ծեծի մասին մեկնաբանություններով, Դօրիանն իր Facebook-յան էջում հայտնել էր, որ իր հետ ամեն ինչ կարգին է, և որ ինքը տեղի ունեցած ծեծկռտուքի հետ որևէ առնչություն չունի:

Տարիներ անց «Կիսաբաց լուսամուտներ» հեռուստածրագրի շրջանակում, Դօրիանը խոստովանեց, որ ծեծի մասին լուրն անձամբ էր տարածել։ Նա ներողություն խնդրեց ծեծված տղայից և նրա հարազատներից՝ նրանց այդ պատմության մեջ ներքաշելու համար և բացատրեց, որ ծեծի մասին լուրն իր անվան հետ կապելով է տարածել՝ իմանալով, որ Թատերական ինստիտուտի ղեկավարությունը պատրաստվում էր կոծկել միջադեպը։