Իսկ գիշերվանից հետո՝ շուշաններ
Իսկ գիշերվանից հետո՝ շուշաններ - հայ գրող Դօրիանի առաջին վեպը և առաջին տպագիր գիրքը։ Վեպը գրվել է 2007 թվականին, երբ հեղինակը 19 տարեկան էր, տպագրվել է 2011 թվականին։ 2012-ի ամռանն այն, հեղինակի համաձայն, արդեն գրանցել է հայաստանյան շուկայի համար բավականին տպավորիչ վաճառք՝ 7 ամսում գրեթե 1000 օրինակ: 2012-ի սեպտեմբեր ամսին տպագրվել է դրա ևս մեկ տպաքանակ[1]: 2017 թվականի աշնանը, վեպի ստեղծման տասներորդ տարեդարձի կապակցությամբ, հեղինակը ներկայացրել է դրա երկրորդ խմբագրությունը՝ էլեկտրոնային գրքի տեսքով։
Բովանդակություն
Կասկածելով ամուսնուն դավաճանության մեջ՝ Շուշանը բացահայտում է նրա կապը երիտասարդ մարմնավաճառուհու՝ Մարիամի հետ։ Սակայն լքել ամուսնուն նա չի շտապում։ Նույն այդ ժամանակ հանելուկային երիտասարդի հայտնվելն իր կյանքում և դեպքերի տարօրինակ զարգացումը ստիպում են կնոջը կասկածել, որ իրեն Արմանից բաժանելն ինչ-որ մեկի խարդախ ծրագիրն է:
Հեղինակը՝ վեպի մասին
2011 թվականի նոյեմբերի 30-ին, «Արմենպրես» լրատվականի հետ իր հարցազրույցում՝ խոսելով «Իսկ գիշերվանից հետո՝ շուշաններ» վեպի մասին, Դօրիանը բացատրել է, թե ինչու է որոշել տպագրել իր հենց այդ աշխատանքը։
Իմ «Իսկ գիշերվանից հետո` շուշաններ» վեպը, տեղադրվելով համացանցում, յուրատեսակ փորձաշրջան անցավ: Չնայած համեմատաբար մեծ ծավալին, այն ընթերցվեց գրեթե երեք հազար անգամ, գտավ միայն ու միայն դրական արձագանքներ: Դա խոսեց այն մասին, որ վեպը կարող է ժողովրդականություն վայելել, կարող է, լինելով մարդկանց համար հետաքրքիր գրականություն, դառնալ նաև պահանջված «ապրանք»: Այն դեռ տպագրության փուլում է, սակայն արդեն կան նախապես պատվիրողներ: Դա ապացուցում է, որ վեպի ընտրության հարցում ես չեմ սխալվել:
2011թ․ դեկտեմբերի 11-ին, իր բացահայտվելուց հետո Tert.am լրատվականի հետ իր հարցազրույցում՝ խոսելով «Իսկ գիշերվանից հետո՝ շուշաններ» վեպի մասին, Դօրիանը նշել է․
Օրեր առաջ լույս տեսավ իմ կողմից այդքան սպասված առաջին գիրքս` վեպ, որն իմ լավագույն աշխատանքներից մեկն էի համարում: Ես ձեռքս առա այն ու սկսեցի սխալներ գտնել` տողեր, որոնց համար փոշմանում եմ, բառեր, որոնք իզուր եմ օգտագործել, ասես օրգանիզմս մերժեր այն, ինչպես վտանգավոր սնունդը կմերժեր:
Աղբյուրներ
- ↑ «Իսկ գիշերվանից հետո՝ շուշաններ» գիրքը Դօրիանի առցանց խանութում – https://dorian.am/product/shushanner-printed/
